El Niger l'è 'l fiöm piö 'mportànte de l'Africa ucidentàla. L'è lonch en tot presapoch 4.160 km. El nas endei mucc Loma al cunfì 'ntra la Guinea e la Sierra Leone e conden percors a fùrma de mèza lüna el streèrsa i teretore del Mali, del Niger, el ghe à dré al cunfì col Benin, el streèrsa la Nigeria e 'l và a sbotàs endel Océano Atlàntich endel Golf de Guinea conden delta flüviàl de grànde dimensiù ciamàt delta del Niger o Oil Rivers.
La sò surtìa la se tróa apéna a 240 km di de l'Océano Atlàntich ma 'nvéce de nà envèrs el mar, el ciàpa la diresiù 'nvèrs l'intèrno del cuntinènt, 'nvers el dezert del Sahara e dòpo el fà 'na gran svòlta a dèstra e 'l ciàpa la diresiù del Golf de Guinea.
Endel teretóre del Mali, prim de Timbuctu, el fùrma chèl che l'è ciamàt delta interno del Niger.
La parte setentriunàla del fiöm, cunusìda come Niger bend, la g'ha 'na grant empurtànsa per el dezert del Sahara perchè l'è la fónt principàla de àiva de la zòna. Chèsto fat el l'ha rindìt en crocevìa per i scàmbe comerciài che pàsa per el Sahara ucidentàl e la cüna dei Regn del Sahel de l'Imper del Mali e de Gao.
El sò bacìno idrogràfich l'è de 2.117.700 chilòmetri quadràcc. L'è 'l tèrs dei fiom de l'Africa, dopo del Nilo e del Congo. El sò afluènt pio grant l'è el Benue.
